กตเมสุ ทฺวีสุ? ตถาคเต จ ตถาคตสาวเก จฯ อิเมสุ โข, ภิกฺขเว, ทฺวีสุ สมฺมาปฏิปชฺชมาโน ปณฺฑิโต วิยตฺโต สปฺปุริโส อกฺขตํ อนุปหตํ อตฺตานํ ปริหรติ, อนวชฺโช จ โหติ อนนุวชฺโช จ วิญฺญูนํ, พหุญฺจ ปุญฺญํ ปสวตี’’ติฯ

[139] ‘‘ทฺเวเม, ภิกฺขเว, ธมฺมาฯ กตเม ทฺเว? สจิตฺตโวทานญฺจ น จ กิญฺจิ โลเก อุปาทิยติฯ อิเม โข, ภิกฺขเว, ทฺเว ธมฺมา’’ติฯ

[140] ‘‘ทฺเวเม, ภิกฺขเว, ธมฺมาฯ กตเม ทฺเว? โกโธ จ อุปนาโห จฯ อิเม โข, ภิกฺขเว, ทฺเว ธมฺมา’’ติฯ

[141] ‘‘ทฺเวเม, ภิกฺขเว, ธมฺมาฯ กตเม ทฺเว? โกธวินโย จ อุปนาหวินโย จฯ อิเม โข, ภิกฺขเว, ทฺเว ธมฺมา’’ติฯ

อายาจนวคฺโค ทุติโยฯ

(13) 3. ทานวคฺโค

[142] ‘‘ทฺเวมานิ , ภิกฺขเว, ทานานิฯ กตมานิ ทฺเว? อามิสทานญฺจ ธมฺมทานญฺจฯ อิมานิ โข, ภิกฺขเว, ทฺเว ทานานิฯ เอตทคฺคํ, ภิกฺขเว, อิเมสํ ทฺวินฺนํ ทานานํ ยทิทํ ธมฺมทาน’’นฺติฯ

[143] ‘‘ทฺเวเม, ภิกฺขเว, ยาคาฯ กตเม ทฺเว? อามิสยาโค จ ธมฺมยาโค จฯ อิเม โข, ภิกฺขเว, ทฺเว ยาคาฯ เอตทคฺคํ, ภิกฺขเว, อิเมสํ ทฺวินฺนํ ยาคานํ ยทิทํ ธมฺมยาโค’’ติฯ

[144] ‘‘ทฺเวเม , ภิกฺขเว, จาคาฯ กตเม ทฺเว? อามิสจาโค จ ธมฺมจาโค จฯ อิเม โข, ภิกฺขเว, ทฺเว จาคาฯ เอตทคฺคํ, ภิกฺขเว, อิเมสํ ทฺวินฺนํ จาคานํ ยทิทํ ธมฺมจาโค’’ติฯ

[145] ‘‘ทฺเวเม, ภิกฺขเว, ปริจฺจาคาฯ กตเม ทฺเว? อามิสปริจฺจาโค จ ธมฺมปริจฺจาโค จฯ อิเม โข, ภิกฺขเว, ทฺเว ปริจฺจาคาฯ เอตทคฺคํ, ภิกฺขเว, อิเมสํ ทฺวินฺนํ ปริจฺจาคานํ ยทิทํ ธมฺมปริจฺจาโค’’ติฯ

[146] ‘‘ทฺเวเม , ภิกฺขเว, โภคาฯ กตเม ทฺเว? อามิสโภโค จ ธมฺมโภโค จฯ อิเม โข, ภิกฺขเว, ทฺเว โภคาฯ เอตทคฺคํ, ภิกฺขเว, อิเมสํ ทฺวินฺนํ โภคานํ ยทิทํ ธมฺมโภโค’’ติฯ

[147] ‘‘ทฺเวเม, ภิกฺขเว, สมฺโภคาฯ กตเม ทฺเว? อามิสสมฺโภโค จ ธมฺมสมฺโภโค จฯ อิเม โข, ภิกฺขเว, ทฺเว สมฺโภคาฯ เอตทคฺคํ, ภิกฺขเว, อิเมสํ ทฺวินฺนํ สมฺโภคานํ ยทิทํ ธมฺมสมฺโภโค’’ติฯ

[148] ‘‘ทฺเวเม, ภิกฺขเว, สํวิภาคาฯ กตเม ทฺเว? อามิสสํวิภาโค จ ธมฺมสํวิภาโค จฯ อิเม โข, ภิกฺขเว, ทฺเว สํวิภาคาฯ เอตทคฺคํ, ภิกฺขเว, อิเมสํ ทฺวินฺนํ สํวิภาคานํ ยทิทํ ธมฺมสํวิภาโค’’ติฯ

[149] ‘‘ทฺเวเม , ภิกฺขเว, สงฺคหาฯ กตเม ทฺเว? อามิสสงฺคโห จ ธมฺมสงฺคโห จฯ อิเม โข, ภิกฺขเว, ทฺเว สงฺคหาฯ เอตทคฺคํ, ภิกฺขเว, อิเมสํ ทฺวินฺนํ สงฺคหานํ ยทิทํ ธมฺมสงฺคโห’’ติฯ

[150] ‘‘ทฺเวเม, ภิกฺขเว, อนุคฺคหาฯ กตเม ทฺเว? อามิสานุคฺคโห จ ธมฺมานุคฺคโห จฯ อิเม โข, ภิกฺขเว, ทฺเว อนุคฺคหาฯ เอตทคฺคํ, ภิกฺขเว, อิเมสํ ทฺวินฺนํ อนุคฺคหานํ ยทิทํ ธมฺมานุคฺคโห’’ติฯ

[151] ‘‘ทฺเวมา, ภิกฺขเว, อนุกมฺปาฯ กตมา ทฺเว? อามิสานุกมฺปา จ ธมฺมานุกมฺปา จฯ อิมา โข, ภิกฺขเว, ทฺเว อนุกมฺปาฯ เอตทคฺคํ, ภิกฺขเว, อิมาสํ ทฺวินฺนํ อนุกมฺปานํ ยทิทํ ธมฺมานุกมฺปา’’ติฯ

ทานวคฺโค ตติโยฯ

(14) 4. สนฺถารวคฺโค

[152] ‘‘ทฺเวเม , ภิกฺขเว, สนฺถารา [สนฺธารา (ก.)]ฯ กตเม ทฺเว? อามิสสนฺถาโร จ ธมฺมสนฺถาโร จฯ อิเม โข, ภิกฺขเว, ทฺเว สนฺถาราฯ เอตทคฺคํ, ภิกฺขเว, อิเมสํ ทฺวินฺนํ สนฺถารานํ ยทิทํ ธมฺมสนฺถาโร’’ติฯ

[153] ‘‘ทฺเวเม, ภิกฺขเว, ปฏิสนฺถารา [ปฏิสนฺธารา (ก.)]ฯ กตเม ทฺเว? อามิสปฏิสนฺถาโร จ ธมฺมปฏิสนฺถาโร จฯ อิเม โข, ภิกฺขเว, ทฺเว ปฏิสนฺถาราฯ เอตทคฺคํ, ภิกฺขเว, อิเมสํ ทฺวินฺนํ ปฏิสนฺถารานํ ยทิทํ ธมฺมปฏิสนฺถาโร’’ติฯ

[154] ‘‘ทฺเวมา, ภิกฺขเว, เอสนาฯ กตมา ทฺเว? อามิเสสนา จ ธมฺเมสนา จฯ อิมา โข, ภิกฺขเว, ทฺเว เอสนาฯ เอตทคฺคํ, ภิกฺขเว, อิมาสํ ทฺวินฺนํ เอสนานํ ยทิทํ ธมฺเมสนา’’ติฯ

[155] ‘‘ทฺเวมา, ภิกฺขเว, ปริเยสนาฯ กตมา ทฺเว? อามิสปริเยสนา จ ธมฺมปริเยสนา จฯ อิมา โข, ภิกฺขเว, ทฺเว ปริเยสนาฯ เอตทคฺคํ, ภิกฺขเว, อิมาสํ ทฺวินฺนํ ปริเยสนานํ ยทิทํ ธมฺมปริเยสนา’’ติฯ

[156] ‘‘ทฺเวมา, ภิกฺขเว, ปริเยฏฺฐิโยฯ กตมา ทฺเว? อามิสปริเยฏฺฐิ จ ธมฺมปริเยฏฺฐิ จฯ อิมา โข, ภิกฺขเว, ทฺเว ปริเยฏฺฐิโยฯ เอตทคฺคํ, ภิกฺขเว, อิมาสํ ทฺวินฺนํ ปริเยฏฺฐีนํ ยทิทํ ธมฺมปริเยฏฺฐี’’ติฯ

[157] ‘‘ทฺเวมา , ภิกฺขเว, ปูชาฯ กตมา ทฺเว? อามิสปูชา จ ธมฺมปูชา จฯ อิมา โข ภิกฺขเว, ทฺเว ปูชาฯ เอตทคฺคํ, ภิกฺขเว, อิมาสํ ทฺวินฺนํ ปูชานํ ยทิทํ ธมฺมปูชา’’ติฯ

[158] ‘‘ทฺเวมานิ, ภิกฺขเว, อาติเถยฺยานิฯ กตมานิ ทฺเว? อามิสาติเถยฺยญฺจ ธมฺมาติเถยฺยญฺจ ฯ อิมานิ โข, ภิกฺขเว, ทฺเว อาติเถยฺยานิฯ เอตทคฺคํ, ภิกฺขเว, อิเมสํ ทฺวินฺนํ อาติเถยฺยานํ ยทิทํ ธมฺมาติเถยฺย’’นฺติฯ

[159] ‘‘ทฺเวมา, ภิกฺขเว, อิทฺธิโยฯ กตมา ทฺเว? อามิสิทฺธิ จ ธมฺมิทฺธิ จฯ อิมา โข, ภิกฺขเว, ทฺเว อิทฺธิโยฯ เอตทคฺคํ, ภิกฺขเว, อิมาสํ ทฺวินฺนํ อิทฺธีนํ ยทิทํ ธมฺมิทฺธี’’ติฯ

[160] ‘‘ทฺเวมา , ภิกฺขเว, วุทฺธิโยฯ กตมา ทฺเว? อามิสวุทฺธิ จ ธมฺมวุทฺธิ จฯ อิมา โข, ภิกฺขเว, ทฺเว วุทฺธิโยฯ เอตทคฺคํ, ภิกฺขเว, อิมาสํ ทฺวินฺนํ วุทฺธีนํ ยทิทํ ธมฺมวุทฺธี’’ติฯ